កំពង់ចាម៖ ឧត្តមសេនីយ៍ទោ ប៊ន សំអាត អនុប្រធាននាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិ បានចេញលិខិតសុំទោសជាសាធារណៈចំពោះកំហុសអចេតនាដែលពាក់ស្បែកជើងចូលក្នុងសាលាឆទាន បង្កឱ្យមានការរិះគន់ពីមហាជនកាលពីថ្មីៗនេះ។
ការដែលមន្ត្រីផ្កាយ២រូបនេះចេញមុខមកសុំទោសជាសាធារណៈ ស្របពេលមហាជនសម្តែងការមិនពេញចិត្តចំពោះកំហុសរបស់ស្នងការរងនគរបាលខេត្តកំពង់ចាម លោក ជា ធារិទ្ធ ដែលមិនដោះស្បែកជើងចូលព្រះវិហារកាលពីថ្មីៗកន្លងទៅ។
លោកឧត្តមសេនីយ៍ទោ ប៊ន សំអាត បានរឿបរាប់ថា លោកមានការសោកស្តាយ និងទទួលស្គាល់កំហុសដោយអចេតនាដោយពុំបានដោះស្បែកជើងពេលជួបសំណេះសំណាលជាមួយលោកយាយ លោកតានៅក្នុងសាលាឆទាន។
មន្ត្រីផ្កាយ២រូបនេះបានសន្យាថានឹងមិនឱ្យមានកំហុសនេះកើតឡើងជាលើកទី២នោះទេ ហើយលោកនឹងខិតខំប្រតិបត្តិទៅតាមធម៌ វិន័យ និងគន្លងព្រះពុទ្ធសាសនាឱ្យបានល្អ។
លោកឧត្តមសេនីយ៍ទោបានបញ្ជាក់ឱ្យដឹងថា កាលពីឆ្នាំ២០១៩ លោកបានបរិចោគដីមួយកន្លែងស្ថិតនៅក្នុងភូមិប្រសំ ឃុំរអាន ស្រុកកំពង់សៀម ខេត្តកំពង់ចាម តម្លៃ១០ម៉ឺនដុល្លារសម្រាប់សាងសង់សាលាឆទានជូនលោកយាយ លោកតា ដែលជាស្រុកកំណើតរបស់លោក៕